Како може да биде дел од обидите за дестабилизација кога претставниците на претходната власт дадоа поддршка на тој закон, како и сегашната власт, а тогашна опозиција. Тие дури го предлагаа со конкретни бројки – кој колку треба да добие и за каков степен на инвалидитет. Што е обид за дестабилизација, праша лидерот на ГРОМ и градоначалник на Карпош, Стевче Јакимовски, говорејќи за Законот за посебните права на припадниците на безбедносните сили и фактот што најверојатно наскоро нема да се најде пред матичната собраниска Комисија за социјална политика, демографија и млади.
Јакимовски посочи дека „некој во оваа држава бараше мнозинство во Парламентот, сега го има и треба да делува“. Очекувањата, според него како што вели, се да немаме заложништво како со претходната влада.
-Бранителите кои што биле таму се луѓе што биле на должност. Ако бил полицаец, не бил обучуван за да обавува воени дејствија, ако бил мобилизиран и ако бил регрут. Тоа важи за сите во безбедносните структури, како и за ЦУК. Тоа се причините зошто на тие луѓе им следува одредено обесштетувања.
Во исто време, не смееме да ги заборавиме и семејствата на загинатите припадници на ОНА. Детето не е виновно ако татко му земал пушка и тргнал да се бори против државата и погинал. За тие деца мораме да водиме сметка. Ниту една мајка не сака да го изгуби чедото. Мораме да водиме сметка и за тие семејства. Прашањето за припадниците на ОНА е друго прашање оти таму се работи за доброволни активности – си формирале нелегални формации кои што извршиле напади врз државата. Тоа се други прашања кои не можат да бидат инкорпорирани во ова, рече Јакимовски во вчерашното издание на „Само вистина“.