„Ако сакаме да ги опишеме состојбите во туристичкиот сектор во 2020 година тоа би го направил со споделување на повеќе статистички податоци односно – помала посета од една милијарда туристи во Европа со пад од 68% за 2020 година. Воздушниот сообраќај загуби 56 милијарди долари ограничувајки ги летовите на само 10% споредбено од 2019 година и со губење на повеќе од 190000 работни места враќајки се во состојба од пред триесет години односно 1990 година . Македонскиот туристички сектор забележува пад од 60,8% туристи и 48% остварени ноќевања во годината кога домашните туристи доминираа во нашите дестинации. Воедно според мене во годината која замина поради падемијата која не затекна и рестрикциите кои ни ги наложи, немаше можност да имаме туризам туку функционирање на секторот под протоколи и прилагодување со моменталната состојба во дестинациите со САРС ков 2 вирусот“, вели во разговор за „Локално“, директорот на Агенцијата за поддршка и промоција на туризмот, Љупчо Јаневски.
Како што посочува Јаневски, кога ќе ја сумираме годината која е зад нас Агенцијата за промоција и поддршка на туризмот беше на висината од својата задача создавајки го кординативното тело во туризмот во кое членуваа сите комори, асоцијации и здруженија, носејќи ги заедно сите четири сетови на мерки за помош во туризмот и фондот за туризам во кој влеа 58 милиони денари од својот буџет. Агенцијата ја отпочна кампањата #домасиедома заедно со ИМЕ Програмата на Швајцарската амбасада израснувајки во досега најуспешната туристичка кампања за домашни туристи. Отворање на зелени коридори со Србија, Косово и Албанија за брз трансвер на патници овозможувајки повеќе туристички посети и градење на можности за вклучување на повеќе земји од балканот.
Според Јаневски, руралните средини и местата во природа, забележаа раст на домашни туристи, токму поради фактот дека беа ограничувањата на патувања и влез на туристи во нашата земја поради пандемијата од Ковид 19.
Во однос на зимските ски центри Маврово, Попова Шапка, Крупево и Пелистер, истите како што посочува во разговорот Јаневски, функционираат под посебни протоколи и се исполнети до крајот на месец јануари. Првиот викенд од оваа година е забележана најголемата продажба на ски билети во Попова Шапка за последните три години, а се очекува и пуштање во употреба на новиот шесто-сед што ќе овозможи повеќе скијачи на терените и гости од регионот. Овие можности треба да се искористат со поголеми вложувања во македонските ски центри и нивна модернизација со што ќе станат повеќе конкурентни на регионалните привлекувајки неколку пати поголем број на туристи.
Но она што не смее да се занемари е тоа дека пандемијата ги покажа и слабите страни на македонскиот туристички сектор кој низ годините се базирална квантитет и висока сезоналност занемарувајки ја латералноста и рамномерниот развој на дестинациите. Малите вложувања во развојот на руралниот, екотуризмот, националните паркови, новите атракции и алтернативните форми на туристички понуди создаваат неможност во вакви услови да се менаџира со дестинациите поради преголем број на туристи .
„По многу нешта во 2021 година планираме мудро, со повеќе искуства од предходната таргетирајки го регионот како примарен пазар од кој очекуваме гости од полскиот,турскиот и холандскиот пазар во зависност од можноста и ограничувањата на патувања. Оваа година ќе биде во знакот на трката со вакцинацијата и отпочнување на економското заздравување и очекувам минусот во туристичкиот сектор кај нас да биде помал од 2020 година“, додава Јаневски.
Агенцијата за промоција и поддршка на туризмот ќе продолжи со кампањата #домасиедома, активно ќе учествува со промоцијата на Македонија како туристичка дестинација, #alliNMacedonia со 100% online промоција, социјални медиуми, блогери, влогери , 360 видео материјали и учество на најпрестижните саемски манифестации за туризам. Создавање на фото брошура преку која ќе се прикажат најубавите фотографии на туристите кои не’ посетиле и ги спорелиле на социјалните медиуми, повеќе електронски изданија „ Скопје градот на солидарноста“, педесет најпосетувани музеи во Македонија и проекти кои ќе откријат нови атракции и овозможат туристички валоризации на 10 најпосетувани врвови од туристите.