Јавниот долг на САД за прв пат достигна 34 трилиони долари, соопшти Министерството за финансии.
Вкупниот неподмирен долг на САД се искачи на 34.001 трилиони долари во петокот, од 33.911 трилиони долари еден ден претходно, покажа дневниот извештај на Министерството за финансии.
Тоа би значело дека јавниот долг го надминал БДП, кој според податоците на Министерството за трговија на крајот на минатиот септември изнесувал 27,6 трилиони долари.
Во средината на минатата година, влијателниот институт CBO, во кој работат поранешни функционери на американската централна банка, Министерството за финансии и Конгресот, процени дека јавниот долг на САД ќе достигне 98 отсто од БДП во 2023 година. Во 2022 година, според официјалните податоци, тој изнесувал 97 отсто од БДП, а во изминатите три децении бил во просек 57 отсто.
До крајот на деценијата треба да порасне до 107 отсто и да го надмине историското ниво, а до 2053 година, според нивните пресметки, ќе достигне 181 отсто од БДП, според долгорочните проценки на институтот, објавени на крајот на минатиот јуни.
Таков голем долг би го забавил економскиот раст и би ги зголемил плаќањата на каматите на странските иматели на американскиот долг и би претставувал значителен ризик за фискалната и економската перспектива, предупреди CBO.
Американските законодавци се враќаат на клупите следната недела за да ги договорат ставовите за владините трошоци во новата фискална година до крајниот рок. Доколку не постигнат договор, на многу државни органи повторно би им се заканувало гасење.
Претстојните претседателски и конгресни избори би можеле да го комплицираат договорот, забележува Ројтерс.
Портпаролот на Белата куќа, Мајкл Кикукава го припиша зголемувањето на јавниот долг на даночните намалувања во 2017 година под републиканскиот претседател Доналд Трамп и републиканското мнозинство во Конгресот.