Американскиот министер за финансии Џенет Јелен се состана со Володимир Зеленски, премиерот Денис Шмихал и други клучни претставници на украинската влада во ненадејна посета на Украина за да ја потврди поддршката на Вашингтон за Киев. Јелен објави фотографија од нејзината средба со претседателот Володимир Зеленски за време на посетата.
САД „ќе продолжат да стојат покрај Украина се додека е потребно“, напиша Јелен на Твитер.
На приватна средба со Зеленски доцна попладнето, Јелен го пофали „за неговото лидерство и решителноста во соочувањето со незаконската и неиспровоцирана војна на Русија“, соопшти американското Министерство за финансии. Министерството за финансии соопшти дека Јелен ги поздравува активностите на Зеленски за зајакнување на владеењето и справување со корупцијата, дејствија потребни за да се обезбеди одговорно трошење на американската економска помош.
Зеленски ја коментираше и средбата со Јелен во Киев. Украинскиот претседател ја опиша средбата како важна, пишувајќи во објава на Телеграм дека САД „силно ја поддржуваат“ Украина од почетокот на инвазијата, не само со оружје, туку и со финансиска помош.