Управата за јавни приходи (УЈП) без одговор зошто голем дел од македонските граѓани не ги добија своите средства кои им следуваат од скенирањето на фискални сметки.
Вчера беше последниот рок за исплата на средствата, а голем дел од граѓаните не ги добија своите средства. Ова се случува за првпат од воведувањето на оваа мерка, која е една од ретките кои директно враќа средства кај граѓаните.
Се работи за редовниот поврат за последниот пресметковен период (јули, август и септември) кој пристигнува на трансакциските сметки.
Управата за јавни приходи соопшти дека налозите за 370 милиони денари, кои не се исплатени на граѓаните, наводно, се веќе подготвени.
Од друга страна апликацијата МојДДВ денеска во поголемиот дел од денот не функционира, односно граѓаните не можат воопшто да скенираат сметки.
Во минатото, средствата беа исплаќани најдоцна до 10-ти во месецот. По доаѓањето на актуелната влада на ВМРО-ДПМНЕ, тој рок се продолжи до крај на месецот. Не е сигурно дали воопшто ќе се исплатат средствата од понеделник, 1 декември.
Граѓани кои не ги добија своите средства од „Мој ДДВ“ за „Локално“ велат дека тврдењата на директорката не се точни, бидејќи досега редовно ги добивале своите средства, немале досега никакви проблеми со транскациската сметка, а и редовно ја ажурираат својата апликација на мобилните телефони.
Инаку граѓаните може во еден квартал да добијат поврат на ДДВ и до 2.100 денари, тоа значи дека доколку едно четиричлено семејство скенира редовно може да направи поврат од 8.400 денари за еден квартален период. За купување на македонски производи повратот е 20 отсто од ДДВ-то, додека за купување увезени производи тоа изнесува 10 отсто.
Каде сепак ,,испарија” средствата за поврат на Данок за додадена вредност за граѓаните е прашањето кое си го поставуваат граѓаните и јавноста.
,,Поскапе парното, поскапе струјата, направија хаос со пензиите, сега нема и поврат за граѓаните. Што е следно”, прашуваат граѓаните на социјалните мрежи.
Граѓани кои не ги добија своите средства од „Мој ДДВ“, вчера за „Локално“ изјавија дека тврдењата на директорката на УЈП, Елена Петрова, не се точни, бидејќи досега редовно ги добивале своите средства, немале досега никакви проблеми со транскациската сметка, а и редовно ја ажурираат својата апликација на мобилните телефони.
„Срамота, иако не се многу пари, тие 2.100 ги одделувам и штедам за своите деца, бидејќи со мизерните плати не ни можеме ништо да заштедиме. Сега и тие не ги дадоа, не знам кај тераат“, вели Александра за нашата редакција, која е мајка на две деца.
„Се мислам дека ќе ја укинат и оваа единствена погодност која ја имавме. Се чудиме како издржа оваа мерка и досега. 1.500 – 2.000 денари добро ни доаѓаа, можев барем некоја сметка да платам“, вели Драган за Локално, пензионер, кој исто така е разочаран од овој исход.
„Не дека ми значат, ама зошто да не им ги дадат на луѓето? Толку многу се испокраде во државава, и ова остана да ни го „украдат“, ни кажа Петар од Скопје, студент.
Јавноста е во очекување на одговори од УЈП, но и од Владата, кога и дали граѓаните ќе си ги добијат своите пари, но и дали планираат, како што се шпекулира, да се укине оваа мерка. Со оглед на високите цени на производите, зголемените режимски трошоци и галопирачката инфлација, ова ќе биде уште еден удар од Владата по џебот на граѓаните.
В.З.