Солидарноста на земјите членки на Европската унија (ЕУ) од Источна Европа со соседите во Белорусија создаде чуда во ЕУ и помогна да се создаде слика за хармонија, пишува Дојче Веле, додавајќи дека ЕУ ретко е толку обединета во надворешно-политичко прашање.
Европската унија безрезервно поддржува мирни протести во Белорусија, повикува на дијалог меѓу сите сили во земјата и се спротивставува на надворешното мешање.
Унијата го исполни и барањето на лидерот на опозицијата, Светлана Тихановскаја, откако не ги призна резултатите од изборите врз основа на кои Александар Лукашенко остана на власт.
По скоро тричасовна, виртуелна средба, германската канцеларка Ангела Меркел изјави дека ЕУ го осудува „бруталното насилство врз луѓето“ во Белорусија и додаде дека изборите не биле слободни и фер, затоа ЕУ не ги признава.
„Слободата на изразување и демонстрација мора да биде загарантирана и сите затвореници да бидат ослободени безусловно“, рече Меркел, пренесува Дојче веле.
Таа истакна дека граѓаните на Белорусија „знаат што е добро за нив“ и дека „само тие“ треба да одлучат за својата иднина, „без надворешно мешање“.
Претседателот на Европскиот совет, Шарл Мишел, изјави дека кризата во Белорусија не е „за геополитиката, туку за правото на луѓето слободно да го изберат своето раководство“.
Треба да се усвои список на санкции и одговорните за изборна измама и брутално насилство врз демонстрантите треба да бидат казнети. Како и досега, санкциите ќе вклучуваат забрани за патувања и блокирање на сметките за внатрешниот круг околу претседателот на Белорусија, Александар Лукашенко.
Имаше такви санкции против околу 200 службеници, вклучително и самиот Лукашенко, меѓу 2004 и 2016 година, но тоа не доведе до промена на курсот во Минск.
Сепак, ЕУ е претпазлива за економски санкции, бидејќи тие би влијаеле врз населението, кое ЕУ сака да го поддржи.
Претседателот на Европската комисија, Урсула фон дер Лејен, исто така, сака да обезбеди 53 милиони евра директна помош за жртвите на насилство, граѓанското општество и оние кои се погодени од пандемијата на коронавирусот во Белорусија.