Ви здодеа да спиете предоцна и да се будите уморни? Решението не е да се „полиете“ со кафе наутро, па експертот за спиење Мајкл Џеј Бројс сподели неколку совети кои можат да го „истренираат“ телото да почне да се буди порано со текот на времето, пишува Mind Body Green.
Бидете доследни
Тој вели дека кога го менувате распоредот за спиење, треба да бидете доследни. Тврди дека се потребни приближно 21 ден за нашиот деноноќен ритам да се прилагоди на новиот распоред и додава дека ако сте навикнати да се будите во одредено време, тоа во никој случај не е толку едноставно како порано да си легнете.
„Кога ќе пронајдете ново време на будење кое сакате да го достигнете, всушност треба да се присилувате да се будите во тоа време 21 ден по ред, за вашиот мозок да се приспособи на тоа“, објаснува експертот, пренесува „Вечерњи лист“.
Држете го алармот подалеку од креветот
Ако алармот ви е веднаш до креветот, веројатно ќе го исклучите веднаш штом ќе се вклучи и ќе продолжите да спиете, но ако го оставите малку подалеку, ќе мора да станете за да го исклучите и најтешкиот дел од будењето ќе заврши.
Ова ќе ве спречи да го одложувате алармот со часови, па ќе станете на време.
Изложете се на природна дневна светлина
Експертот објаснува дека останувањето на светлина најмалку 15 минути веднаш штом се разбудиме му сигнализира на мозокот дека ова е време кога треба да се будиме секој ден.
Во текот на денот, вашиот прозорец може да биде отворен, за што повеќе дневна светлина да влезе во вашиот стан, пишува Mind Body Green.
Не се потпирајте на кафе
Тој, исто така, советува да го исклучите кофеинот колку што е можно додека се обидувате да го прилагодите вашиот распоред, бидејќи тоа нема да ви даде толку многу енергија колку што мислите.
Ако почнете да консумирате помалку кофеин, сонот ќе ви биде поквалитетен, а добро е да се откажете од алкохолот кога сакате да се разбудите порано, бидејќи тоа негативно влијае на сонот.
Најдете мотивација
Ако имате пријател или член на семејството кој ја дели вашата цел да се разбудите рано, можете да се потпрете еден на друг.
Експертот вели дека можете наизменично да се јавувате наутро, мотивирајќи се да станете. Ако тоа не е опција, може да биде корисно да имате задача или посветеност што бара од вас да станете, како на пример да го однесете кучето на прошетка наутро или да закажете подоцнежен состанок.