Германскиот сојуз на синдикати е свесен за тешката економска состојба во земјата и бара зголемување на минималната саатница на 15 евра, како и укинување на малите работни места, односно мини работите. Сојузот на синдикати изразува загриженост за економскиот развој во новата година.
„Економската криза се заканува да се зацврсти уште повеќе доколку итно не се преземат соодветни мерки“, рече претседателката на ДГБ, Јасмин Фахими на годишната прес-конференција во Берлин.
– При обезбедувањето на идната одржливост на нашата земја, сопирачката за задолжување не треба да се применува уште од самиот почеток – нагласи таа.
Во моментов има голем инвестициски дефицит измерен во милијарди евра.
Конкурентни цени на енергијата
Според претседателката на синдикатот, „токсичната мешавина од лошо управување, економска слабост и структурни недостатоци“ веќе ја чини Германија многу работни места, додека останатите работни места се под зголемен притисок.
Затоа таа очекува новата федерална влада да обезбеди „трезвена привремена проценка на досегашната политика за климата и трансформацијата“. Ова вклучува брзо постигнување конкурентни цени на енергијата, обука на експерти и поддршка на иновациите.
Против општото намалување на данокот на добивка
Фахими не поддржува широки субвенции за компаниите преку општи намалувања на корпоративните даноци. Наместо тоа, предлага временски ограничени инвестициски бонуси, при што субвенционираните компании треба да гарантираат сигурност на работата и почитување на колективните договори.
„Нема помош без нешто за возврат“, рече таа.
За проблемите во автомобилската индустрија, таа повика на субвенции за купување електрични автомобили, забрзано проширување на инфраструктурата за полнење и поголема транспарентност на цените на струјата.
Зголемена вработеност како решение за притисок врз социјалното осигурување
Извршниот одбор на ДГБ предупреди на укинување на социјалната држава. „Во реалноста, придонесите за социјално осигурување не се клучни за повисоки нето приходи, туку олеснување за кирии, енергија и контрола на цените“, рече Фахими.
Како решение за финансиските потешкотии на системот за социјално осигурување таа се залага за поголемо вработување и елиминација на малите работни места без социјално осигурување. Исто така, ја нагласува потребата од зголемување на вработеноста на жените и воведување законско пензиско осигурување за самовработените лица.
Нејзината колешка од администрацијата Ања Пил повика на стабилно ниво на пензија, кое во иднина треба да се зголеми на 50%.
Минимална саатница од 15 евра
ДГБ бара минималната плата во следните преговори, закажани за лето, да биде „одржлива и отпорна на сиромаштија“.
– Минималната саатница сега мора да биде околу 15 евра – беше нагласено.
Сегашната минимална саатница е 12,82 евра.