Американското комично шоу Saturday Night Live често прави пародија на Доналд Трамп, но во последното издание хуморот беше насочен кон ќерката на претседтелот – Иванка.
Во улога на Првата ќерка влезе актерката Скарлет Јохансон. Скечот претставуваше рекламирање на парфем наречен Complicit (complicity – соучество -н.з.).
Јохансон се појавува во прекрасен вечерен фустан на елегантна забава.
„Жена како неа заслужува сопствен парфем. Мирис создаден само за неа. Бидејќи таа е убава. Таа е влијателна. Таа е соучесник“, вели глас зад сцената.
„Таа не ги бара светлата на рефлекторите, но ние ја гледаме. О, како ја гледаме“, продолжува гласот додека „Иванка“ си става кармин, а откако ќе се погледне во огледалото, го гледа одразот на својот татко Доналд Трамп (одигран од Алек Болдвин) .
„Complicit – парфемот за жена која може да спречи сѐ, но нема да го направи тоа“, завршува скечот.
Ова е прв пат во кој Скарлет Јохансон ја игра Иванка Трамп. Пред тоа во нејзиниот лик влезе друга актерка – Марго Роби.