Високиот претставник на Европската Унија за надворешни работи и безбедносна политика, Каја Калас, денес пристигна во Киев за да разговара со украинските претставници за финансиската и воената помош, енергетската безбедност и одговорноста на Русија за воените злосторства.
На заедничка прес-конференција со украинскиот министер за надворешни работи Андриј Сибихa, Калас објави дека ЕУ веќе обезбедила 800 милиони евра за поддршка на Украина во текот на зимата, првенствено за купување генератори, додека дополнителни 100 милиони евра се планирани за опрема и засолништа при ниски температури, објави украинскиот јавен сервис Перши.
Дополнително, Европската Унија издвои 10 милиони евра за поддршка на работата на специјален трибунал за кривичното дело агресија против Украина, како и шест милиони евра за помош на децата и жртвите на сексуално насилство.
„Русија ја уништи секоја надеж за брз мир, поради што ЕУ планира долгорочна поддршка за Украина“, рече Калас.
Како што истакна таа, ЕУ обезбеди две милијарди евра за купување беспилотни летала, а мандатот на цивилната мисија на ЕУ во Украина ќе биде проширен за да вклучи сајбер безбедност и поддршка за ветераните.
„Поради продолжувањето на војната, мора да ги користиме сите извори на финансирање. Размислуваме за заем за репарации врз основа на замрзнати руски средства. Русија мора да плати за оваа војна, а не европските даночни обврзници“, рече шефот на европската дипломатија.
Калас истакна дека ЕУ научила многу од Украина, особено во однос на употребата на беспилотни летала, наведувајќи дека е потребно да се инвестира во опрема против беспилотни летала и тесна соработка со украинската воена индустрија.