Канадска пиварница им нуди на Канаѓаните „претседателско пакување“ пиво за оние кои сакаат да го преживеат целиот претседателски мандат на американскиот претседател Доналд Трамп со едно пиво дневно, објави Си-Ен-Ен.
Јужниот сосед на Канада се заканува со царини, анексија и предизвикува многу друг хаос, па најстарата канадска пиварница заклучи дека на Канаѓаните можеби ќе им треба пиво дневно за да преживеат во следните четири години.
Пиварата Moosehead, основана во 1867 година, во петокот промовираше огромна кутија со 1.461 лименка лагер, што, под претпоставка дека се пие по едно пиво на ден, е „доволно да го издржи целиот претседателски мандат“ на американскиот претседател Доналд Трамп.
Достапно само на веб-страницата
„Ако почетокот на 2025 година нè научи нешто, тоа е дека ќе биде потребна решителност да ја пребродиме четиригодишната политичка несигурност – а има ли подобар начин да се помине секој ден, отколку со вистинско канадско пиво“, сподели Карен Григ, маркетинг директор на Moosehead од Њу Бранзвик.
„Претседателскиот пакет“ се продава само на веб-страницата на Moosehead. Достапно е за жителите кои живеат во канадските провинции Онтарио, Њу Бранзвик и Нова Шкотска за околу 3.500 канадски долари, вклучувајќи го и превозот.
Moosehead Brewery е основана истата година како и Канада, и двете „преживеале многу“ во изминатите 158 години. „Иако не можеме да предвидиме како ќе се одвиваат следните четири години, имаме чувство дека овој голем пакет ќе ни се најде“, додаде Григ. Како и другите канадски компании, Moosehead не е задоволен од тарифите што ги наметнува Трамп.
Околу 20% од пивото на Moosehead се продава во САД.