На Ливерпул му треба задолжително освежување на напаѓачката тројка поради речиси сигурното заминување на Садио Мане, изјави поранешниот дефанзивец на тимот и аналитичар на Sky Sports, Џејми Карагер.
„Црвените“ се на пат да го привлечат Дарвин Нуњез од Бенфика со рекорден трансфер во историјата на клубот, а Уругваецот треба да го замени Садио Мане.
И додека Карагер го споделува своето разочарување што напаѓачкото трио од најсилните години се распаѓа, тој признава дека е време да се подмлади.
„Ливерпул под водство на Јирген Клоп обично ги привлекува вистинските играчи и тоа особено важи за скапите трансфери. Ова им се случи и на Вирџил ван Дајк и на Алисон Бекер, кои прават разлика“, рече тој во анализата за Скај Спорт.
„На Ливерпул навистина му треба освежување на напаѓачката тројка, која игра фантастично во последните четири-пет години. Штета е да се гледа како се распаѓа, но сето тоа завршува порано или подоцна. Се чини дека Садио Мане заминува, а Ливерпул мораше да направи нешто. Како одамна да знаат што им треба. Мислам дека од следната сезона напаѓачката тројка ќе биде Салах, Нуњез и Дијаз лево“.