Секогаш сме биле прагматични, но вината за прагматичното решение е во Македонија. Бугарија прва ја призна Македонија. Кога беше под грчко ембарго, Бугарија даваше и финансиска помош. Целата трговија на Македонија поминувала низ Бугарија, а тие успеале да опстанат благодарение на Бугарија. Кога имаше граѓанска војна во 2001 година, Бугарија даде воена помош. Со потпишувањето на Договорот за добрососедство на 1 август 2017 година и уште пред да почнат да го спроведуваат, Бугарија се согласи Македонија да влезе во НАТО, вели поранешниот бугарски вицепремиер и претседател на ВМРО-БНД, Красимир Каракачанов за емисија на „БНТ“.
Каракачанов ја коментираше и средбата меѓу премиерите на Бугарија и Македонија и потпишаниот договор.
„Најпрво беше грешка да се оди на нивно тло. Новото е што испратија како официјална нота до ОН дека името Северна Македонија се однесува само на територијата на нивната Република Северна Македонија. Тоа е добро. Но, погледнете реакцијата на македонскиот претседател по средбата со нашиот премиер, па затоа велам дека нашиот премиер нема голема причина за оптимизам“, оценува Каракачанов.
„Лошата работа е што нашиот премиер како историска писменост е нула, а тимот што може да го советува е уште една нула. Не можете да одите и да кажете дека во Бугарија имало фашистички режим, но Бугарите не биле фашисти. Тој мораше да им одговори, господа, немаше фашизам во Бугарија и тоа е научно докажано и треба да ставите крај на овие југословенски и советски клишеа“, додава поранешниот министер за одбрана.
„Зборуваме за големиот успех што за два месеци ќе има авионско поврзување меѓу Софија и Скопје, но никој нема да патува со оваа авиолинија. Во 2009 година таквата авиолинија беше укината затоа што никој не сакаше да патува“, објаснува Каракачанов.
Според него, идеите на новата бугарска влада нема да се остварат бидејќи не функционираат.
„Не можете да се откажете од вашиот идентитет, од фактот дека во Скопје е во прашање политика на говор на омраза. Што значи да се успее? Да се клекне пред тврдењата на Македонците или да ги направиме нормални европски граѓани. Наш интерес е да да се однесуваме како суверена држава и да се однесуваме како луѓе кои ги бранат интересите на Бугарија, а не како никаквеци“, заклучува Каракачанов.