Ако вашиот лекар ве советувал да работите на намалување на крвниот притисок или на подобрување на вашето кардиоваскуларно здравје, можеби не знаете од каде да започнете. Не е лесно да се ослободиме од навиките кои ги практикуваме со години без размислување.
Охрабрувачката вест е дека 90 отсто од срцевите заболувања може да се спречат со исхрана и здрав начин на живот. Кардиологот д-р Каустуб Дабхадкар вели дека клучот за здраво срце е промислено и постепено воведување на долгорочни промени.
„Тоа е поефикасно отколку да се обидувате наеднаш да го промените целото мени или начин на живот. Има една промена која може да направи голема разлика и позитивно да влијае на здравјето на срцето, а ние секогаш им ја препорачуваме прво на луѓето. Гответе повеќе“, вели кардиологот.
Лекарот тврди дека готвењето има такво влијание затоа што ја намалува количината на преработена храна што обично ја јадеме. Според Центрите за контрола и превенција на болести, 70 отсто од консумираниот натриум доаѓа од преработена храна или оброци што се јадат надвор од домот.
Ова е клучно бидејќи исхраната богата со натриум е директно поврзана со високиот крвен притисок и лошото кардиоваскуларно здравје.
Кога готвите сами, можете да ги контролирате сите употребени состојки, не само солта, туку и рафинираните јаглехидрати, шеќерот и заситените масти.
„Исхраната богата со калории, особено со заситени масти, транс масти и рафинирани јаглехидрати, го зголемува нивото на лоши масти во телото и нивото на инсулин. Со тоа се зголемува и таложењето на холестерол во артериите, што доведува до стврднување на артериите и формирање на наслаги во нив“, објасни докторот.
Според него, најлоша храна за здравјето на срцето се чипсот, сладоледот и пијалоците засладени со шеќер.
Кога готвите оброци дома, фокусирајте се на храна која е добар извор на влакна и незаситени масти и која има низок гликемиски индекс. Покрај горенаведеното, за здравјето на срцето е корисно да вежбате, да го намалите нивото на стрес, да спиете доволно и да одржувате социјални контакти.