Украинскиот министер за надворешни работи Андриј Сибиха во вторникот испрати силна порака до НАТО, велејќи дека Киев „нема да прифати“ никакви безбедносни гаранции освен полноправно членство во НАТО.
Во писмото упатено до неговите колеги од НАТО, Сибиха рече дека „единствената вистинска безбедносна гаранција за Украина, како и одвраќање од понатамошна руска агресија врз Украина и други земји, е полноправното членство на Украина во НАТО“.
„Нема да прифатиме никакви алтернативи, сурогати или замени за полноправното членство на Украина во НАТО“, рече тој, додавајќи дека само таков потег ќе се спротивстави на руската агресија.
Тој посочи дека претходните договори, како што е меморандумот од Будимпешта од 1994 година, кој требаше да ја заштити Украина откако таа се откажа од нуклеарното оружје, се покажаа како бесмислени.
„Неуспехот да се обезбеди Украина со вистински, ефективни безбедносни гаранции во 1990-тите беше стратешка грешка што Москва ја искористи. Оваа грешка мора да се исправи“, истакна Сибиха.
Писмото доаѓа пред состанокот на министрите за надворешни работи на НАТО во вторник и среда во Брисел, на кој ќе се разговара за поддршката за Украина. И покрај поканата на Киев, за време на самитот не се очекуваат значителни чекори кон поканување на Украина во алијансата.
Официјални лица во Киев се повеќе губат надеж дека Украина наскоро ќе се приклучи на воената алијанса, а новоизбраниот претседател на САД, Доналд Трамп предлага да се одложи членството на Украина во НАТО за најмалку 20 години, како дел од потенцијалниот мировен договор со Русија.
„Мислам дека сегашната администрација не го искористи моментот што можеше да биде за покана за НАТО“, рече минатата недела украинската министерка за правда Олга Стефанишина, коментирајќи ја администрацијата на актуелниот американски претседател Џо Бајден.