Воздухопловните сили на Украина соопштија дека Русија лансирала интерконтинентална балистичка ракета (ICBM) од регионот Астрахан за време на напад рано утринава. Нападот бил насочен кон Днепар, со „различни видови ракети“.
Ова е првпат Русија да лансира ICBM кон Украина за време на конфликтот, пишува BBC. Тие ракети се способни да патуваат илјадници километри.
Украинската војска, исто така, соопшти дека за време на нападот соборила шест крстосувачки ракети Kh-101.
Нападот доаѓа неколку дена откако Вашингтон и даде зелено светло на Украина да користи ракети со поголем дострел, како што е ATACMS, кои Украина, наводно, ги користела претходно оваа недела за да ги гаѓа руските воени бази.
Што е ICBM?
Балистичките ракети се способни да патуваат илјадници километри од областа од која се лансирани. Постојат четири типа на балистички ракети – краток, среден, интернедиарен и долг дострел.
Интерконтинентални балистички ракети со најголем дострел – можат да поминат повеќе од 5.500 километри.
Ова значи дека ICBM можат да погодат цели буквално насекаде во светот.
Тие можат да носат конвенционално оружје, како и нуклеарни боеви глави, првично се лансираат со ракети, а потоа следат траекторија без напојување кон нивните цели.
Балистичките проектили се разликуваат од крстаречките ракети кои патуваат со млазни мотори, како што се оние што се користат за придвижување на авиони.
Крстосувачките проектили, како ракетите „Storm Shadow“ што Украина ги истрела вчера кон Русија, патуваат пократки растојанија, но можат рачно да се водат до целта.
Кремљ одбива да коментира
Портпаролот на Кремљ Дмитриј Песков одби да ги коментира информациите дека Русија утринава лансирала интерконтинентална балистичка ракета кон Украина.
Во официјалното соопштение на Министерството за одбрана, исто така, нема информации за лансирањето.
Пријавени се првите жртви
Регионалниот командант на Днепар изјави дека две жртви се повредени откако Русија утринава лансираше ракета во областа Днепар.
На лице место укажана е повреда на 57-годишен маж, а во болница е пренесена 42-годишна жена, објави Серхи Лисак на Телеграм.
Во нападот е оштетен центарот за рехабилитација за лица со посебни потреби, но нема повредени. Дополнително, пријавено е дека се оштетени и девет гаражи и едно „индустриско претпријатие“, додава Лисак.
Уште две лица се повредени и во моментов се во болница по нападот во Криви Рог, западно од реките Днепар. Уништена е административната зграда, а оштетени се и две станбени згради, вели Лисак.