Севернокорејскиот лидер Ким Јонг-ун посети фабрика за козметика во Пјонгјанг, а во негово друштво беа неговата сопруга Ри Сол-ју и неговата сестра Ким Јо-јонг, пишува BBC.
Државните медиуми објавија фотографии од посетата во неделата, а двете споменати жени ретко се појавуваат во јавност.
Јо-јонг се појави недолго откако доби нова моќна позиција во севернокорејската влада.
Странските луксузни производи, вклучително и козметиката полека исчезнуваат од Северна Кореја, поради санкциите од Обединетите нации.
Во последните неколку години многу земји престанаа да извезуваат луксузна стока во Северна Кореја, што исто така е одредено со санкциите. Но, земјата очигледно развила сопствена козметичка индустрија, а локалните брендови Bomhyanggi и Unhasu станаа многу популарни.
Иако, Ким Јон-ун главно се појавува на фотографии од воени објекти со ракети пред лансирање, оваа посета на фабрика за козметика е добра пропаганда. Се појавуваше и во други фабрики а државните медиуми известуваа за значителен напредок на производството на 3D телевизори и смартфони.
Целта е да се покаже дека Северна Кореја може да се грижи за сопствениот народ и да им парира на Пекинг и на Сеул, истакнува аналитичарот Анкит Панда.
За време на посетата Ким ја пофали фабриката и рече дека произведува козметика која е на светско ниво.