Приватниот музеј, кој го поседува култниот фустан на Мерлин Монро, дозволи трајно да се оштети кога ѝ го позајми на ѕвездата Ким Кардашијан за нејзината посета на Мет Гали минатиот месец, објави во средата колекционер на предмети поврзани со Монро.
Платинесто русокосата Кардашијан блесна, но и предизвика контроверзии кога го облече прекрасниот тесен фустан, кој Монро го носеше во 1962 година за да ја отпее „Среќен роденден господине претседателе“ на тогашниот американски претседател Џон Кенеди.
Скот Фортнер, колекционер кој води веб-страница посветена исклучиво на Монро, објави фотографии од крем фустанот украсен со кристали пред и откако Ким Кардашијан го носеше.
Фотографиите по облекувањето ги направи пријателот на Фортнер, кој го виде фустанот изложен во музејот Ripley’s Believe It or Not во неделата во Лос Анџелес, кој го поседува фустанот и кој ѝ дозволи на Кардашијан да го носи.
Се чини дека на фотографиите се гледа мало оштетување на ткаенината во близина на куките што го држат фустанот, но и кристали кои висат на конецот, додека некои недостасуваат.
Наводното оштетување на фустанот, кој „Рипли“ го купи на аукција за рекордни 4,8 милиони долари, во последните денови предизвика огромни критики на социјалните мрежи.
Во објавата на својот Инстаграм во средата, Фортнер нагласи дека „го обвинува Рипли што дозволил да се носи фустанот“.
„Чувствувам дека секоја ѕвезда на која ќе ѝ биде понудена можност да ја носи оваа облека многу веројатно ќе ја искористи можноста. Има причина зошто некој би сакал да ја носи. Само што се испостави дека Ким е таа. Таа сега е трајно оштетена и веројатно ќе се оштетела независно од тоа кој ја носел“, рече Фортнер.
„Рипли“ не одговори на прашањата на АФП за наводите во средата попладне. На почетокот на мај музејот ја објави можноста Кардашијан да го носи фустанот.
„Посветена е голема грижа за зачувување на ова парче историја. Со совети на конзерватори за облека, проценители, архивари, обезбедување, состојбата на облеката беше најголем приоритет“, велат од музејот.
Кардашијан, која наводно била на строга диета за да може да се вклопи во легендарниот фустан, не одговори на обвинувањата на своите социјални мрежи.