Годишната стапка на инфлација во Кина изнесуваше скромни 0,3 отсто во октомври, што укажува на послаба потрошувачка на домаќинствата и ги зголемува стравувањата од дефлација и забавување на економскиот раст во азиската земја.
Економистите анкетирани од Ројтерс очекуваа малку повисок раст на инфлацијата од 0,4 отсто, но владиниот фискален стимул во Пекинг сè уште не го донесе посакуваниот резултат.
Според извештаите, годишната стапка на базичната инфлација во Кина се зголеми за 0,2 отсто во октомври, што е благо забрзано во споредба со септемвриските 0,1 отсто, пренесе CNBC.
Цените на храната во Кина се зголемија за 2,9 отсто на годишно ниво, додека цените на непрехранбените производи паднаа за 0,3 отсто, пред се поради падот на цените на превозот од 4,8 отсто и падот на трошоците за домување за 0,1 отсто.
Резултатот од стимулативните мерки на побарувачката во Кина сè уште не е јасен поради ефектот на неработните денови на националниот празник, „Златната недела“, во октомври, коментира главниот економист на JLL, Брус Панг.
Кина очекува економски раст од 4,8 отсто во 2024 година и 4,5 отсто во 2025 година, според сегашната прогноза на Меѓународниот монетарен фонд (ММФ).
Властите во Пекинг се борат со сложената ситуација во секторот на недвижности и слабата побарувачка и се обидуваат да ја стимулираат домашната побарувачка со фискални мерки за Кина да го постигне планираниот годишен економски раст од околу пет проценти на крајот на годината, објави претходно „Блумберг“.