Кинескиот претседател Си Џинпинг изрази надеж дека најавената средба меѓу лидерите на САД и Северна Кореја, Доналд Трамп и Ким Џонг-ун ќе се одржи што е можно поскоро. Си денеска телефонски разговарал со Трамп при што побарал двете страни на претстојната средба да покажат добра волја и да се воздржат од чекори кои може да ја влошат стабилноста на Корејскиот полуостров, јави новинската агенција ДПА.
Трамп ја шокираше американската јавност кога најави дека прифатил средба со Ким, додека во исто време Северна Кореја се согласила да ги запре своите ракетни проби. До неодамна Трамп и Ким си разменуваа закани за нуклеарна војна, откако Северна Кореја изврши неколку ракетни проби во кои нејзините проектили ја надлетаа Јапонија.
– Верувам дека, доколку двете страни се држат до општата цел да се постигне политички и дипломатски договор, сигурно ќе го придвижиме Корејскиот полуостров во насока која меѓународната заедница долго ја посакуваше, соопшти кабинетот на кинескиот претседател по телефонскиот разговор со Трамп.