Светската метеоролошка организација (СМО) објави дека летото 2023 година на северната хемисфера на Земјата било најжешкото досега.
СМО, како меѓувладина специјализирана организација на Обединетите нации и Европската климатска служба Коперник во средата објавија дека август е најтоплиот месец забележан од почетокот на употребата на современа опрема и втор најтопол месец досега по јули оваа година.
Август беше околу 1,5 степени Целзиусови потопол од прединдустриските просеци, што е прагот на затоплување што светот се обидува да не го надмине.
Температурата на океаните, кои покриваат повеќе од 70 отсто од површината на Земјата, била највисока досега и била речиси 21 Целзиусов степен, објавија СМО и Коперник.
„Климатскиот колапс започна“, предупреди генералниот секретар на Обединетите нации, Антонио Гутереш, според извештајот.
Според Коперник, 2023 година е втора најтопла година досега, по 2016 година.
Научниците ги обвинуваат климатските промени предизвикани од луѓето поради согорувањето на јаглен, нафта и природен гас, но и притисокот на природниот метеоролошки феномен Ел Нињо, кој привремено затопли делови од Тихиот Океан.
Климатологот Ендрју Вивер изјави дека бројките објавени од Светската метеоролошка организација и Коперник не се изненадувачки. Тој посочи дека владите не го сфатиле доволно сериозно прашањето за глобалното затоплување и изрази загриженост дека јавноста едноставно ќе заборави на ова прашање кога температурите повторно ќе паднат.
„Време е глобалните лидери да почнат да ја кажуваат вистината. Нема да го ограничиме затоплувањето на 1,5 степени; нема да го ограничиме затоплувањето на два степени. Сега се работи за тоа како да се спречи глобалното затоплување од три степени Целзиусови – ниво на затоплување што ќе предизвика хаос низ целиот свет“, вели Вивер, професор на Универзитетот Викторија во Канада.
Додека температурите на воздухот и океаните се на рекордно ниво, Антарктикот продолжи да бележи рекордно ниски количества морски мраз, соопшти Светската метеоролошка организација.