Египќанецот Мохамед Салах дојде во Ливерпул во 2017 година како замена за Кутињо кој замина во Барселона и за речиси осум години на „Енфилд“ стана еден од најдобрите и најважните играчи во историјата на овој клуб.
А, речиси и да немаше причина фудбалерот на Рома во тоа време да не дојде во Англија, бидејќи тренерот на тимот Јирген Клоп беше против негово ангажирање. Ова во изјава за англиските медиуми го вели тогашниот директор на скаутинг службата на „црвените“, Јан Греам, кој со тоа ги потврди зборовите на легендата на овој клуб Џејми Карагер, кој го кажа истото.
„Клоп имаше други планови. Неговата желба беше во клубот да го доведе Џулијан Брант, кого го знаеше од Германија. Беше убеден дека е вистинското решение за Ливерпул, но ние во скаутинг службата имавме поинакво мислење. Го следевме Салах долго време и тврдевме дека тој е вистинскиот играч за нашиот клуб“, изјави Греам и додаде:
„Се договоривме со Клоп дека Брант е голем талент, но анализите што ги правиме за сите играчи ни кажаа дека Салах е најдобриот играч на неговата позиција во Европа. Покрај сето тоа, Рома во тие години имаше финансиски проблеми и знаевме дека можеме да добиеме многу квалитетен играч по добра цена“.
Салах потпиша договор со Ливерпул на 1 јули 2017 година во трансфер вреден 44 милиони фунти, а за клубот од „Енфилд“ одигра 393 натпревари, постигна 243 гола и забележа 109 асистенции.