Менаџерот на Ливерпул, Јирген Клоп даде повеќе информации за повредените во тимот. Многу од клучните играчи на тимот се надвор од терените поради повреди, но тоа не ги спречи „црвените“ да го освојат десеттиот Лига куп во неделата. Неговите играчи ќе мора брзо да го свртат вниманието на друг турнир бидејќи утре ќе му гостуваат на Саутемптон во осминафиналето на ФА Купот.
„Ни треба чудо за некои играчи. Затоа не сакам да отпишам никого. За Дарвин, Мо и Дом, мора да видиме. Ватару Ендо доби голем удар и ништо не се смени од неделата”, изјави Клоп.
Мохамед Салах, Дарвин Нуњез и Доминик Собослај го пропуштија неделното финале и се под знак прашалник за утрешната пресметка. Тренерот додаде дека Рајан Гравенберч ќе ги пропушти следните неколку натпревари, објаснувајќи дека неговата ситуација можела да биде многу полоша. Тој доби тежок удар по скочниот зглоб од Мојсес Каиседо на натпреварот против Челси.
„Се уште не знам со каков состав ќе излеземе. Има два часа до нашиот тренинг, ќе видиме кој ќе пристигне. Вчера беше ден за закрепнување и само младите момци имаа целосен тренинг. Денешната сесија ќе ни ги даде потребните информации за тоа кој ќе игра утре“, додаде Германецот.
Тој зборуваше за утрешниот противник Саутемптон: „Чемпионшип е неверојатна лига. Импресивно е тоа што се случува таму. Тие не се во нивните најдобри, но имаат важен натпревар во сабота. Го сакам Чемпионшип. Ги гледав Лидс против Лестер минатата недела, леле. Интензитетот таму е извонреден. Играме многу натпревари, а тие играат уште повеќе“.
„Светците“ загубија три од последните четири натпревари и моментално се четврти на табелата.
Клоп објасни дека некои од младите утре би можеле да бидат во стартниот тим, не заборавајќи да ги пофали младите таленти кои импресионираа во неделата и последните недели.
„Тие не треба ништо да докажуваат. Неделата беше една од најголемите фудбалски приказни. Момците играат во јуниорите и неодамна станаа дел од првиот тим, немаат никакво искуство, туку многу талент. Нема притисок, тие мора да уживаат во тоа, што и го прават. Нашиот ростер е подлабок отколку што мислевме на почетокот на сезоната. Многу пати сум кажал: без децата немаше да бидеме тука“, додаде тој.