Клубовите од Премиер лигата денеска се состануваат на вонреден состанок на кој треба да се разговара за евентуална суспензија на првенството поради кризата со Ковид. Дури шест од десетте натпревари кои требаше да се одиграат викендов се одложени поради многу случаи на заразени играчи.
Вчера Томас Тухел изрази огорченост поради тоа што мечот на Челси со Вулверхемптон исто така не беше одложен од Премиер лигата и покрај седумте заразени кај лондончаните. И Јирген Клоп не можеше да искористи пет играчи на дербито со Тотенхем, по што Германецот рече дека едноставно не може да продолжи со вообичаениот напорен распоред за време на празничната сезона.
Според „Дејли мејл“, една од најверојатните опции е да се одложи едно коло од Премиер лигата. Ова се натпреварите меѓу 28 и 30 декември. Има и предлози за одложување на сите натпревари кои мора да се играат до крајот на 2021 година, а фудбалот да се рестартира викендот од 8 до 9 јануари 2022 година, доколку дозволат условите. Според замислата тогаш треба да се одиграат натпреварите од третото коло во ФА Купот кои традиционално се одржуваат веднаш по Нова година. Битката во Премиер лигата треба да продолжи на 15 јануари.
За да се одобри некој од овие предлози, тој мора да биде поддржан од 14 од 20-те клубови во Премиер лигата.
Сепак, тврдењата на телевизиите, како и компримираниот календар поради Светското првенство во Катар следната година, многу го отежнуваат ваквиот прекин. Затоа раководството на Премиер лигата ќе направи се за да го избегне.
Ќе се разговара и за протоколот според кој натпреварите се одложуваат, бидејќи навивачите се пожалија на доцните одлуки, кои не им даваат време да реагираат. Сличен беше случајот и со натпреварот помеѓу Астон Вила и Барнли, кој беше одложен два часа пред да започне.