Од 1 февруари корисниците на Твитер ќе можат да поднесат жалба за суспензијата на сметките и ќе се воведат нови критериуми за оценување за повторно воспоставување на сметките на таа платформа, објави денеска Ројтерс.
Компанијата во петокот соопшти дека според новите критериуми, сметките на Твитер ќе бидат суспендирани само за сериозни или повторени прекршувања на политиките на платформата.
„Сериозните прекршувања“ на правилата вклучуваат објавување нелегална содржина или активност, поттикнување или закана за насилство или повреда, како и намерно вознемирување на други корисници.
Твитер соопшти дека во иднина ќе ги ублажи мерките за суспензија на сметката, со укинување на ограничувањата на обемот на навредливи твитови и бара од корисниците да ги отстранат проблематичните твитови пред да продолжат да ја користат сметката.
Сопственикот на Твитер, американскиот милијардер Елон Маск, во декември се најде на удар поради суспендирање на сметките на неколку новинари бидејќи тие јавно објавија информации за неговиот авион, а подоцна Маск им ги врати сметките на новинарите.
Потсетуваме дека тој го купи Твитер во октомври минатата година за 44 милијарди долари.