По нападот врз Јемен, предводен од Соединетите Американски Држави со помош на Австралија, Бахреин, Канада, Холандија и Велика Британија, Хутите изјавија дека избила „голема битка во Црвеното Море“ и дека битката „ ќе биде поголем отколку што очекуваа Британците и Американците“.
Република Јемен е земја во Југозападна Азија, со брегови на Црвеното Море, Аденскиот Залив и Арапското Море. Станува збор за земја со околу 30 милиони жители, пишува Институтот за блискоисточна политика од Вашингтон.
Кој го осуди нападот?
Иранското министерство за надворешни работи соопшти дека нападот од ноќеска е обид да се „прошири целосната поддршка на САД и Велика Британија во последните 100 дена за воените злосторства на ционистичкиот режим против палестинскиот народ и опколените граѓани на Газа“. Иран, исто така, нападот утринава го нарече „јасно кршење“ на суверенитетот и меѓународното право. За нападот се огласи и Ирак, обвинувајќи го Западот за ширење на конфликтот и зголемување на тензиите.
Либанската милитантна група Хезболах соопшти дека американската агресија уште еднаш потврдува „дека САД се целосен партнер во трагедиите и масакрите извршени од ционистичкиот непријател во Газа и во регионот“.
Слична порака испрати и палестинскиот исламски џихад, во кој се наведува дека оваа „агресија потврдува дека американската администрација води геноцидна војна против палестинскиот народ во Газа“.
Русија побара свикување на Советот за безбедност на ОН денеска поради воздушните напади на територијата на Јемен, објави постојаната мисија на Русија во ОН на својот Телеграм канал.
Кои се сојузници и непријатели?
Иран ги поддржува Хутите во нивното долгогодишно непријателство со Саудиска Арабија. Анализата објавена од Советот за надворешни односи вели дека Јемен доживува една од најтешките хуманитарни кризи во светот поради осумгодишниот конфликт меѓу меѓународно признатата влада, поддржана од воената коалиција предводена од Саудиска Арабија, и бунтовниците Хути поддржани од Иран.
За главни противници на Хутите се сметаат Саудиска Арабија и Обединетите Арапски Емирати, кои ги нарекуваат слуги на САД и Израел.
Од друга страна, во 2015 година, Саудиска Арабија состави коалиција од арапски држави со сунитско мнозинство: Бахреин, Египет, Јордан, Кувајт, Мароко, Катар, Судан и Обединетите Арапски Емирати (ОАЕ). До 2018 година, коалицијата се прошири за да вклучи сили од Еритреја и Пакистан.
Тие претходно извршија воздушни напади врз јеменските бунтовници.
САД ја поддржаа коалицијата предводена од Саудиска Арабија, како и Франција, Германија и Обединетото Кралство. „Скај њуз“ наведува дека во оваа коалиција на поддршка се и Данска и Јужна Кореја.
Коалицијата објави заедничка изјава во која се наведува дека овие напади се одговор на „нелегалните, опасните и дестабилизирачки Хути кои напаѓаат бродови“.
Некои американски сојузници на Блискиот исток, вклучително и земјите од Персискиот залив – Катар и Оман, изразија загриженост дека најновите напади против Хутите би можеле да излезат од контрола и да го вовлечат регионот во поширока војна со другите ирански сојузници, како што се Хезболах и Иран, пишува „Њујорк тајмс“.
Како што пишува Атлантскиот совет, нападите што се случија во петокот ќе предизвикаат регионални реперкусии и ќе го зголемат ризикот од регионална ескалација, а тешко дека ќе ја запрат агресијата на Хутите во Црвеното Море.