„Човек од Флорида, роден за битка“, гласи описот на профилот на Мет Гаец на платформата X која порано се викаше Твитер. МАГА радикалот, кој себеси се смета за либертаријански популист, во последните месеци го презеде водството над саботерската фракција на Републиканската партија во Конгресот и ужива во вниманието на светските медиуми по хаосот кој уследи по соборувањето на Кевин Мекарти во Домот на пратениците.
Роден во 1982 година во семејство на истакнати американски политичари, Гаец уште од рана возраст знаел дека сака да ги следи стапките на својот татко Дон и дедо Џери. По дипломирањето на правниот факултет и краткотрајното стажирање во адвокатска фирма во Флорида, Гаец се свртел кон политиката и служеше како претставник во Претставничкиот дом на Флорида од 2010 до 2016 година, по што се пресели во Вашингтон, како републикански претставник на првиот округ на Флорида во Конгресот.
Скандал со малолетнички
Меѓутоа, на интернет има неспоредливо помалку информации за неговата политичка кариера отколку за бројните скандали поврзани со неговото име.
Во 2008 година бил уапсен поради возење под дејство на алкохол, откако бил приведен поради пребрзо возење во населено место и одбил алкотест. Од правен аспект, попроблематичната приказна започнува во 2020 година, кога американската тајна служба добила анонимна дојава дека во 2018 година, додека бил претставник во Конгресот, Гаец учествувал во организирана мрежа на подведување на малолетнички за сексуални услуги и користење сексуални услуги на малолетни проститутки.
Министерството за правда било принудено да покрене посебна федерална истрага за приватното патување на Гаец на Бахамите во 2018 година за да ги пронајде ескорт дамите кои им правеле друштво таму на пратеникот и неговиот пријател Џејсон Пироцоло. Работата на истражителите во голема мера ја олеснила поранешната девојка на Гаец, која ги насочила кон потребните финансиски трансакции. Имено, неколку од тогашните мобилни плаќања на Гаец во описот на плаќањето ги содржеле имињата на ескорт девојките кои подоцна се покажало дека се помлади од 18 години. Гаец и Пироцоло тврдеа дека донирале средства за школарина за девојчиња.
Обид за поткуп на соработници на Трамп
Поради тежината на доказите, соработникот на Гаец од Флорида, Џоел Гринберг, се изјасни за виновен за подведување малолетнички, а во замена за намалена затворска казна, реши да соработува со истражителите во врска со улогата на Гаец во целата приказна, при што наводно на ФБИ му доставил фотографии од Гаец на сексуални оргии со малолетнички. Гринберг, исто така, признал дека еднаш се обидел да го поткупи Роџер Стоун, соработникот на Трамп, во име на Гаец, за претседателот да му обезбеди помилување поради секс со малолетнички во замена за 250.000 долари во биткоини.
Гаец жестоко ги отфрли сите обвинувања, нагласувајќи дека и самиот бил жртва на криминална уцена од неколку функционери на министерството за правда и огорчени поранешни соработници кои бараат од него повеќемилионски суми во замена за молчење, а во меѓувреме се појавија докази дека Гаец за помош да се прикријат гласините и големите обвинувања се обратил до својот татко Дон, поранешниот претседател на парламентот на Флорида, од кого тој барал 25 милиони долари.