Два месеца по една од најголемите трагедии во поновата историја на земјата, кога 61 млад живот згасна во пожарот во дискотеката „Пулс“ во Кочани, движењето „Кој е следен?“ со герила-акција пред Обвинителството во Скопје ги потсети институциите дека одговорноста сè уште ја нема.
„Ова не е само бројка – ова се изгубени приказни, прегратки што нема да се вратат, и болка што не стивнува,“ порачаа од движењето, обвинувајќи за молк, политички препукувања и медиумска хајка врз семејствата кои бараат правда.
Активистите повикаа на неселективна правда и крај на системската корупција, која, според нив, е директна причина за трагедијата. Утре најавија протест во Кочани и ги повикаа сите граѓани да им се придружат и да им дадат поддршка на родителите на загинатите.
„Не смееме да заборавиме. Ова е борба за секој од нас – за живот без страв, без неправда, без молк.“