Комерцијалните аеродроми со редовен патнички сообраќај од поранешна Југославија, вкупно 21, опслужија вкупно 31.389.457 патници во периодот од почетокот на јануари до крајот на септември, објави порталот EX-YU Aviation News.
Со 6,8 милиони патници и процентен скок од 5,9 проценти во споредба со истите девет месеци од претходната година, Белград остана најпрометен аеродром во поранешна Југославија, додека аеродромот во Приштина е најбрзо растечкиот аеродром во регионот во апсолутна смисла, бидејќи има речиси 441.000 патници повеќе од минатата година.
Хрватска како земја беше најбрзо растечкиот пазар, со 742.007 патници повеќе во споредба со збирот од првите три квартали од 2024 година.
Единствените два аеродроми кои досега оваа година опслужиле помалку патници отколку минатата се Осиек и Брач, додека резултатот на Подгорица, со 1.776 патници, е малку подобар од пред една година.
– Меѓу помалите аеродроми во регионот, Тузла почна да се опоравува, поддржан од новите услуги од Виз Ер, Пегасус Ерлајнс и АЏет… Аеродромот во Бања Лука, исто така, додаде над 70.000 патници (во споредба со минатата година), првенствено благодарение на проширувањето на Виз Ер, а во помала мера и на Рајанер. Заедно, четирите аеродроми во Босна и Херцеговина додадоа вкупно 494.303 патници (во однос на минатогодишниот резултат во првите три квартали) – објави EX-YU Aviation News.