Во Италија е означен како тренер кој гарантира трофеј. Таков беше и во првиот мандат во англиската Премиер лига. Но, Тотенхем не е Челси, па Антонио Конте тешко се помирува со осмата позиција на табелата, особено по трите последователни порази во првенството. Последниот беше остварен на мечот со Вулверхемптон, по двата примени гола во воведните 20 минути.
Пропуштена е добра шанса да се доближат до четвртото место на табелата и Лигата на шампионите. И иако е разлика од само пет бода, се чини дека ниту играчите на Тотенхем не веруваат дека можат да стигнат до европската елита. Или така му изгледа на Конте.
– Проблемот е што не можете да купите победнички менталитет, можете само да го менувате од ден на ден. Не е сигурна работа, филозофски почна Италијанецот.
Да не превзема дел од вината на себе не е негов начин. Не, секогаш е некој друг крив, сега се играчите. И Конте тоа го објаснува на страшен начин.
– Има играчи кои се поотворени. На некои им треба време да го разберат ова. Победничкиот менталитет според мене значи дека сум подготвен да те убијам за да живеам. Секој пат треба да имате поголема желба од противникот. Кога ќе го сфатите тоа, поразот ќе ве боли, и тоа не малку. Тоа не е лесно, истакна Конте.
Сепак, тој застана во одбрана на играчите, коментирајќи ги свирежите на публиката на полувремето.
– Мораме да бидеме реални, мораме да бидеме едно со нашите навивачи. И нашите навивачи треба да сфатат дека е потребно трпение, треба да чекаат да го изградам амбиентот на кој беа навикнати во минатото. Околностите се сменија. Не само кај мене, така беше и со другите тренери во минатото. Работиме напорно со играчите, тие се многу посветени, но тоа не е доволно. Треба да почекаме и да градиме, тула по тула. Мора да бидеме реални, заклучи Конте.