По истрагата на Етичкиот комитет, УЕФА покрена дисциплинска постапка против Реал, Барселона и Јувентус, бидејќи со обединувањето со цел лансирање на Суперлигата, тие ги прекршиле правилата на Европската фудбалска централа.
Набргу по објавувањето дека е поведена постапката, бројни шпански и италијански медиуми пишуваат дека УЕФА ќе ги исфрли трите клуба од Лигата на шампионите следната сезона и ќе ги казни со високи суми пари.
Реал, Барселона и Јувентус би можеле да поднесат жалба на ваква казна до КАС, Високиот спортски суд, но доколку таа одлука остане, се знае кој би ги заменил во Лигата на шампионите, објави шпанското радио „Копе“.
Истиот извор наведува дека тоа би биле Реал Сосиедад, Бетис и Наполи. Овие клубови ја завршија сезоната веднаш под линијата во шпанскиот и италијанскиот шампионат, односно четвртото место, последното што води во Лигата на шампионите.
За потсетување, Реал, Барселона и Јувентус се единствените преостанати од 12-те основачи на Суперлигата, практично затворено елитистичко натпреварување од 20 клуба, кое, ако заживее, ќе ја уништи Лигата на шампионите на УЕФА.
Сепак, пред еден месец тоа експресно пропадна, само два дена по објавувањето. Толку требаше половина од клубовите, т.е. сите англиски основачи, да го напуштат. Веднаш се повлекоа Арсенал, Челси, Ливерпул, Манчестер Сити, Манчестер Јунајтед и Тотенхем. Атлетико, Милан и Интер го сторија тоа во следните два дена.
Пропаѓањето на Суперлигата, барем за некое време, се случи затоа што по објавувањето на нејзиното промовирање, дојде до огромна огорченост од навивачите на Суперлигата и сите други клубови, владите на земјите и УЕФА и ФИФА. Затоа девет клуба ја напуштија Супер лигата и неволно се вратија под покровителство на УЕФА.
Сепак, Реал, Барселона и Јувентус инсистираат на тоа дека Суперлигата не е завршена. Затоа се казнети од УЕФА.