Европската Унија ја смета Украина за приоритетен кандидат за членство, изјави европската комесарка за проширување Марта Кос во интервју за ЊПолитико“.
Според неа, проширувањето на Унијата повеќе не е само прашање на ставот кон кандидатите, туку и на внатрешната способност на ЕУ да одговори на предизвиците на современиот момент.
– Не станува збор само за привлекување кандидати – туку и за нас: можеме ли да се справиме со предизвиците? Дали е тоа корисно за нашата безбедност? Дали ги пополнуваме празнините што ги оставивме во минатото? Да. Дали ни треба Украина во ЕУ? Да – нагласила Кос.
Таа истакнала дека во следните 12 месеци, Европската Унија ќе мора да донесе конкретни и суштински одлуки со цел да го забрза процесот на прием на нови земји-членки и да обезбеди институционална безбедност. Според неа, претстојниот период ќе биде клучен за дефинирање на иднината на политиката на проширување.
Прашањето за европската интеграција на Украина се повеќе се поврзува со безбедносната архитектура на континентот и долгорочните геополитички интереси на Брисел.
Претходно беше објавено дека некои американски претставници признаваат дека Русија нема забелешки за евентуалното пристапување на Украина во Европската Унија, што во дипломатските кругови се толкува како значаен сигнал во контекст на пошироките односи меѓу Истокот и Западот.