Градоначалникот на Општина Струмица, Костадин Костадинов најави дека пожарникарите од неговата општина од овој месец ќе ја добијат заслужената награда за својата храброст и пожртвуваност. Како што информира, со новите решенија тие ќе бидат најплатени во Македонија, со месечна плата од 80.000 денари.
-Тоа е најмалку што можеме да направиме за луѓето кои секојдневно го ризикуваат сопствениот живот за да спасат туѓ. Истовремено, потпишани се решенијата и за сите вработени во општинската администрација, кои согласно колективниот договор ќе добијат 20% зголемување на платите. Тоа е порака дека трудот и посветеноста во служба на граѓаните не остануваат незабележани. Знам дека ниту една бројка не може да ги надомести сите стресови, ризици и одговорности. Но ова е доказ дека Струмица знае да каже благодарам не само со зборови, туку и со дела, истакна градоначалникот.
Според Костадинов, ова не е само финансиска одлука туку симбол на почит и симбол на вреднување.
-Симбол на нова ера во која храброста и чесниот труд стојат на пиедестал. Од денеска секој пожарникар спасител и секој вработен во општината знае дека нивниот град стои зад нив, со почит, со благодарност и со дела што траат, стои во објавата на струмичкиот градоначалник.