Гневот, револтот и одбивноста кај сите струмичани кон Владата на ВМРО-ДПМНЕ растат од ден на ден. Да, ова се случува во Струмица! Нашите најмили, нашите деца, се на мета на небрежноста и неодговорноста на властите, обвини градоначалникот на општина Струмица, Костадин Костадинов. Вели дека се соочуваат со тотално немање емпатија од страна на властите „чии акции изгледа имаат само една цел – да го уништат сè што е струмичко“.
-Проблемите со детските градинки во Струмица се сериозни. Детските градинки во Струмица се соочуваат со сериозен недостаток на стручни лица, воспитувачи, негуватели и технички персонал, што ја загрозува основната функција на овие установи. Од формирањето на новата Влада, пратени се повеќе барања, но до денес не се добиени конкретни одговори, а едно барање е одбиено. Иако за 2025 година има предвидени средства за нови вработувања, Владата ги игнорира нашите потреби, истакнува Костадинов.
Како што информира струмичкиот градоначалник, детската градинка “Виножито” има капацитет за 17 воспитни групи и 300 деца, но во моментот згрижува 387 деца, додека 40 се на листата на чекање. Потребни се најмалку 10 воспитувачи и негуватели, и 3 технички кадри за нормално функционирање.
-Детската градинка “Детска радост”: Има потреба од 14 нови вработувања, но не е добиен позитивен одговор од Министерството за финансии.
Недостаток на лиценциран кадар: Од 28.01.2024 година, по преземањето на Министерството за труд и социјална политика од страна на техничкиот министер, процесот на лиценцирање на кадар за работа во градинките се уште не е откочен. Ова значи дека веќе 15 месеци се немаат одржани испити за лиценцирање. Овие недостатоци сериозно влијаат на квалитетот на услугите и го доведуваат во прашање згрижувањето на сите деца во детските градинки на територијата на Струмица, наведува Костадинов и порачува да не се дозволи да се загрози иднината на децата.
-Не можеме да останеме мирни додека Владата продолжува да ги игнорира потребите на нашите граѓани. Принудени сме да размислуваме за други чекори и постапки со кои ќе ги заштитиме нашите деца и нивните права! Сите деца заслужуваат квалитетно воспитание и грижа, а Струмица нема да дозволи никој да ги загрози нивните шанси за подобра иднина, порача градоначалникот на Струмица