„Се надевам дека реториката во Република Северна Македонија ќе се намали, дека ќе ја надминеме омразата и фалсификатите што ги подметнаа тоталитарните режими, било да е тоа во Титова Југославија или во комунистичка Бугарија, откако премиерот на Северна Македонија, Христијан Мицоски, толку убедливо победи на изборите“. Ова го изјавил бугарскиот европратеник Андреј Ковачев од редовите на ГЕРБ пред новинарите во Брисел.
Тој додал дека ќе продолжи да инсистира на преговарачката рамка, во која експлицитно се споменува бугарската заедница и се постигнуваат сериозни резултати во врска со Договорот за добрососедство меѓу Македонија и Бугарија.
„Ова не е дополнителен услов. Ова е нешто што Република Северна Македонија го прифати како основа за преговорите за членство во Европската Унија. Има работи во Договорот од 2017 година кои се исклучително јасни. Не треба да има говор на омраза. Ова не се ниту европски, туку универзални човечки вредности. Не треба да биде опасно ако кажете дека сте Бугарин. Опасно е ако не можете да имате кариерен развој. Опасно е вашите деца да бидат навредувани во училиште или да ви го уништат бизнисот“, истакнал Ковачев.
Тој дал пример дека меѓу Грција и Бугарија, и покрај противречностите во минатото, сега не се воспоставуваат „слични односи како во Македонија кон Бугарија“.
Ковачев додал дека постои закон за бугарско државјанство, кој треба подобро и јасно да ги регулира релевантните процедури со потребните проверки и публицитет. Тој, исто така, изразил задоволство од денешниот Договорот потпишан за подготовка, изградба и работа на прекуграничен железнички тунел меѓу двете земји.
„Тажно е што ништо не е направено толку многу децении. Немаме железничка врска помеѓу Скопје и Софија и во поширок контекст помеѓу Јадранското и Црното Море. Ова е исклучително стратешки важно и во однос на новите реалности во светот и побрзото движење на одбранбената опрема“, рече и Ковачев.