Премиерот Димитар Ковачевски, оцени дека секојдневните дојави за бомби во нашата земја не се изолирани случаи зад кои стојат тинејџери или хакери, туку „хибридна војна“.
„Кога е организирано со толкав интензитет, со толку широк опфат, таргетирање места, институции, згради и градови со голем број жители, каде пораки кои се исти се повторуваат во повеќе земји, може да се претпостави дека се работи за „хибридна војна“, рече Ковачевски на прес-конференција.
Како што истакна, ова не е феномен само во Северна Македонија, туку и во голем број други земји.
„Бидејќи ако случајот со адолесцентот хакер беше изолиран, тоа немаше да се случи во толку многу земји, во толку исти институции, во толку многу исти денови, со ист интензитет“, рече премиерот.
Според него, ако пораките испратени во Северна Македонија за закани со бомби се споредат со пораките во Црна Гора или други земји, тоа се речиси идентични пораки во начинот на објавување на бомбите.
„Фактот што една земја успеа да најде еден случај на лице што праќа закани не значи дека сите се пронајдени. Рековме и дека е пронајден случајот со наш граѓанин за кој се води постапка. Сакам да нагласам уште еднаш. Ова што се случува во Европа е најголемиот воен конфликт од Втората светска војна. Се води војна, на помалку од 1.000 километри од нашата земја“, рече Ковачевски.
Според него, ако се погледне содржината на анонимните предупредувања за поставени бомби, многу е јасно дека во Европа има две страни.
„Има една страна која вели дека државите не треба да го одредуваат нивниот демократски пат, како што и беше ускратено на Украина, дека помалите држави не можат сами да одлучуваат за својата иднина, дека секој може да ги нападне и да бара промена на власта, организацијата. А другата страна на која и припаѓаме, страната на демократскиот свет, членка на НАТО, онаа која ја сочинуваат земји членки на ЕУ или ќе станат нејзини членки“, рече премиерот на Северна Македонија.
Анонимните пораки за поставени бомби најпрво почнаа да пристигнуваат на 26 октомври до основните и средните училишта, а во последните денови и до трговските и деловните центри, државните институции, спортските здруженија и гимназиите.
Ковачевски пред неколку дена изјави дека е „речиси апсолутно невозможно“ да се најдат луѓе кои испраќаат анонимни закани за бомби.