На Минхенската безбедносна конференција годинава, Северна Македонија учествуваше како рамноправна членка на НАТО. Во исклучително турбулентни времиња, средбите кои ги имавме со нашите стратешки партнери беа фокусирани на предизвиците кои претстојат на полето на европската и светската безбедност, вели во својата видео изјава премиерот Димитар Ковачевски.
Минхенската конференција пред сѐ, вели тој, јасно ја демонстрираше целосната и силна обединетост на сите НАТО и ЕУ сојузници и партнери, и го прецизираше фокусот кон заедничко надминување на сите предизвиците поставени пред Европа, САД и светот.
„На средбите со највисоките претставници на НАТО, ЕУ, Соединетите Американски Држави и со сите останати, ја потврдивме нашата определба за зачувување на безбедноста и стабилноста, како на регионот, така и во светски рамки. Уште еднаш добивме едногласна и моќна поддршка од сите сојузници и затоа остануваме и понатаму силно посветени на евроинтеграциите, нашиот европски пат е трасиран и јасен“, посочува премиерот.
Според него, новиот пристап и енергија во разговорите со Софија беше препознаен како правилен и по него треба да продолжиме за конечно да ги надминеме разликите.
„Интеграцијата на Северна Македонија во Европската Унија значи започнување на нова ера на економски напредок, стабилност и развој за нашите граѓани. Од овој пат не смееме да се откажеме. На средбите уште еднаш ја потврдив нашата позиција дека Берлинскиот процес останува приоритет, а на иницијативите како што е „Отворен Балкан” гледаме како на нов инспиративен поттик за регионалната соработка“, изјави Ковачевски.