Висок американски разузнавач изјави дека руски проектили паднале во Полска, членка на НАТО, и дека во таа прилика загинале две лица, пренесе вчера АП. Полската влада потврди дека две лица загинале во експлозија на истокот на земјата, но не прецизираше што ја предизвикало. Варшава синоќа одлучи да ја зголеми борбената готовност.
По тој повод доцна синоќа се огласи и премиерот Димитар Ковачевски. Тој изрази сочувство до неговиот полски колега, Матеуш Моравецки и полскиот народ за загубата на двата животи во експлозијата.
-Ова е време да бидеме уште порешителни во нашата основна задача – да ја одржуваме територијата на НАТО безбедна и сигурна. Работиме заедно со сојузниците за да се соберат сите факти за овој трагичен настан, објави Ковачевски на својот официјален Твитер профил.
Condolences to @MorawieckiM and the Polish people for the loss of life in the explosion near Ukrainian border. This is a time to be even more resolute in our core task – keep NATO territory safe and secure. Working together with Allies to gather all facts on this tragic event.
— Dimitar Kovachevski (@DKovachevski) November 15, 2022
Шефот на кабинетот на полскиот претседател Павел Шрот објави дека полскиот претседател одлучил за денеска да свика состанок на Советот за национална безбедност.
Претходно полскиот претседател Анджеј Дуда разговараше за ситуацијата во врска со падот на ракети на полска територија со генералниот секретар на НАТО, Јенс Столтенберг.