Мора да ја видиме и дисциплинската постапка и потоа да видиме пратениците како ќе се однесуваат согласно со податоците и согласно со нормално документите коишто таму ќе бидат презентирани, рече премиерот Димитар Ковачевски во врска со снимката на која се слуша гласот на претседателот на Собранието, Талат Џафери како навредува вработени.
Собранието, додаде премиерот, има соодветни комисии во кои се разгледува однесувањето на пратениците во Собранието во однос на усогласеноста со етичкиот кодекс на однесување.
– Колку што знам веќе дел од пратениците имаат иницијативи во таа насока и затоа јас би се повикал прво на следење на процедурата, следење на етичкиот кодекс на однесување и следење на процедурите во Собранието на Република Северна Македонија. Зошто? Затоа што да не заборавиме Собранието е посебна законодавна власт во државата, Владата е посебна – извршна власт и секако дека претседател на Влада не може да биде тој што ќе спроведува процедура во однос на она што го има како процедура во Собрание. Јас се надевам дека таму согласно со сите наводи и докази коишто ги споменавте дека ќе биде испочитувана процедурата и дека соодветно ќе бидат донесени понатамошни одлуки коишто се во надлежност на Собранието, меѓутоа и на други постапки, рече македонскиот премиер.
Тој оставува на ставот оти не сака да дава други коментари на снимката бидејќи, само се слуша глас и не се знае кој со кого или на кого му зборува.
– Не може да се дава оценка за нешто каде што се слушаат гласови, оти јас не сум бил таму, така што најдобар одговор може да дадат тие кои биле во самата сала и кои нормално дека ќе бидат дел од постапката што ќе си се води во соодветната Комисија, рече Ковачевски.