Рускиот Кремљ објави дека претседателот Владимир Путин би можел да се сретне со украинскиот претседател Володимир Зеленски, но само под услов претходно да се постигнат одредени договори.
Портпаролот на Кремљ, Дмитриј Песков, не прецизираше точно какви услови поставува Русија како предуслов за таков состанок. Путин и Зеленски не се сретнале од декември 2019 година.
„Таква средба е можна – како резултат на работата на делегациите на двете страни, со цел постигнување на одредени резултати во форма на договор. Сметаме дека е можна“, рече Песков.
Сепак, тој додаде следново: „Во исто време, во моментот на потпишување на документите за кои делегациите би постигнале договор, за нас останува главното и основно прашање: кој точно ќе ги потпише тие документи од украинска страна“.
Зеленски наводно бил подготвен да се сретне со рускиот претседател оваа недела во Турција. Сепак, Путин наместо тоа испрати тим советници и службеници да се сретнат со украинските преговарачи во Истанбул вчера, во првите директни разговори од март 2022 година.
Путин претходно ја доведе во прашање легитимноста на украинскиот претседател, објаснувајќи дека мандатот на Зеленски истекол минатата година. Поради воената состојба што сè уште е на сила во Украина, тамошните претседателски избори сè уште не се закажани.