На прес-конференција од собранието, пратеникот од Левица, Борислав Крмов, како прв потписник и иницијатор за Надзорна расправа во Собранието за трагедијата во Кочани, изрази загриженост за последиците од националната катастрофа и моралната одговорност на пратениците.
„Во овие моменти, кога сѐ уште не е поминат шокот од незамисливата национална катастрофа која се случи во Кочани, ние како пратеници и како Собрание, особено пратениците од Изборна единица 3, мора да поднесеме морална одговорност. Поради тоа, денес, јас, како пратеник од ИЕ 3, покренувам иницијатива за Надзорна расправа во Собранието околу катастрофата што ни се случи во Кочани“, изјави Крмов.
Тој истакна дека расправата ќе биде планирана во постојаната Анкетна комисија за слободите и правата на граѓанинот, со која раководи Димитар Апасиев, но дека се отворени и за други комисији.
„За таа цел, потребни се минимум 15 потписи, и ние ги даваме нашите шест. Отвараме простор за Анкетна комисија, но има и временска Анкетна комисија. Во тој случај, ќе се повикаме на член 76 став 3 од Уставот, за која се потребни 20 потписи. Апсолутно, на нас не ни е битно кој ќе го води процесот, поентата е да се почне сега и веднаш за да се дојде до одговорите кои ни се потребни“, додаде Крмов.
Тој истакна дека е загрижен за политичките препукувања помеѓу ДПМНЕ и СДСМ во медиумите во врска со тоа дали треба да се одржи Надзорна или Анкетна расправа.
„Ние мислиме дека нема време за ова, доволно време одмаравме, треба да се делува што побргу. Мора да се види каде потфрлија органите на државната управа, зошто ни се случи ова што ни се случи и кои индивидуи се одговорни“, заклучи Крмов.