Европратеникот од ДПС / Обнови Европа, Илхан Ќучук, кој е и постојан известувач за Република Северна Македонија, го претстави својот извештај за напредокот пред Комитетот за надворешни работи. По одлуката на Европскиот совет да ги отвори пристапните преговори со Северна Македонија во март годинава, свикувањето на првата меѓувладина конференција беше одложено поради недостаток на напредок во односите со Бугарија.
Според Ќучук, и покрај сложената пандемиска ситуација, Северна Македонија успеа да одржи демократски избори и заслугите на државата и владата заслужуваат признание.
„Новата влада демонстрира континуитет во нејзината посветеност кон европскиот и евроатлантскиот пат на земјата преку спроведување стабилни и инклузивни демократски реформи и преземање важни чекори за зајакнување на демократијата и владеењето на правото“, рече тој.
Ќучук, исто така, не го негираше фактот дека се потребни брзи реформи и поголем напредок во некои области, но рече дека владата има целосен потенцијал да продолжи по патот кон европската интеграција.
Подоцна, европратеникот се состана со министерот за надворешни работи на Северна Македонија, Бујар Османи. За време на разговорот, Ќучук како камен на сопнување за свикување на првата меѓувладина конференција, го категоризираше недостатокот на компромиси за спорните прашања со Бугарија, но изрази надеж.
„Се надевам дека наскоро ќе го надминеме овој ќор-сокак и повторно ќе тргнеме во вистинската насока. Бугарија и Северна Македонија мора да вложат напори да ги решат проблемите, бидејќи оваа стагнација не само што го нарушува кредибилитетот на ЕУ, туку има и директно негативно влијание во нашите земји. Верувам дека обете страни ќе продолжат со конструктивни разговори, бидејќи во спротивно, гледаме алармантен развој на ситуацијата, имено растечки национализам и говор на омраза. Разбирањето и меѓусебното почитување меѓу нашите граѓани ќе биде клучно за решавање на спорот“, вели Ќучук, цитиран од „24 часа“.