Косовскиот премиер Албин Курти доцна синоќа на Твитер потврди дека на барање на американскиот амбасадор во Приштина, Џеф Ховениер ќе го одложи за 48 часа изрекувањето на казните за влез на граѓани со таблички КМ на територијата на Косово.
Амбасадорот на Соединетите Американски Држави на социјалните мрежи ја изрази својата загриженост поради неуспехот да се постигне договор меѓу претседателот на Србија, Александар Вучиќ и премиерот на Косово, Албин Курти, вчера во Брисел и му предложи на премиерот на Косово го одложи спроведувањето на казните.
Курти му се заблагодари на Ховениер и потврди дека го прифаќа неговото барање.
„Го прифаќам неговото барање за одложување од 48 часа во издавањето казни за незаконските КМ (и други) автомобилски таблички. Среќен сум што ќе работам со САД и ЕУ за да се најде решение во следните два дена“, објави тој на Твитер.
I thank Ambassador Hovenier for his commitment and engagement. I accept his request for a 48-hour postponement on imposition of fines for illegal ‘KM’ (and other) car plates. I am happy to work with the US and the EU to find a solution during the next two days. https://t.co/iXq1SCM8JL
— Albin Kurti (@albinkurti) November 21, 2022
Косовската полиција рано синоќа потврди дека од 22-ри ноември ќе почне да изрекува казни за возачите кои управуваат возила со српски регистарски таблички, а изрекувањето на казните ќе започне денеска по 8 часот.
Да потсетиме, вчера во Брисел се сретнаа српскиот претседател Александар Вучиќ, косовскиот премиер Албин Курти, шефот на европската дипломатија Жозеп Борел и специјалниот пратеник на ЕУ Мирослав Лајчак, а на средбата, како што тогаш беше најавено, не беше постигнат договор. Трилатералната средба траеше неколку часа.
Двете страни не постигнаа договор затоа што, како што рече Борел на прес-конференцијата, Курти не го прифатил барањето на европските функционери за стопирање на сите дејствија поврзани со пререгистрацијата на возилата.
Ова го потврди претседателот на Србија на вонредна прес-конференција по враќањето од Брисел.