Австрискиот канцелар Себастијан Курц е задоволен од исходот на Самитот на ЕУ за повеќегодишниот буџет на Унијата и фондот за реконструкција по кризата со коронавирусот, што тој го оценува како добар резултат за ЕУ и Австрија.
„Јас сум крајно задоволен од содржината на договорот. Постигнавме добар резултат за ЕУ и добар резултат за Австрија “, истакна Курц во изјавата за печатот.
Тој рече дека е постигнат договор за финансиската рамка и за „соодветен одговор на корона кризата“.
Австрија и „штедливите земји“ (Холандија, Шведска и Данска) се судрија со германската канцеларка Ангела Меркел и францускиот претседател Емануел Макрон, кои бараа повеќе средства, без условувања, за земјите-членки погодени од тековната криза.
Курц вели дека силната соработка на „штедливите држави“ довела до исполнување на нивните бројни барања.
Како пример, Курц ја наведе големината на буџетот на ЕУ во однос на првиот нацрт, инвестиции во иднина, временски ограничен фонд за реконструкција.
Тој истакна дека е договорено Фондот да биде само еднократен инструмент, а не почеток на заедничко задолжување или должничка унија.
Курц објасни дека е договорено средствата од фондот првенствено да се користат за инвестиции во заштитата на животната средина, дигитализацијата и реформите.
„Контролата врз користењето на средствата е обезбедена со многу строги механизми. Во случај на сомневање за неправилна употреба, исплатата може веднаш да се прекине “, објасни тој.
Тој се пофали и со „попустот“ што го доби Австрија, односно се зголеми од 137 милиони на 565 милиони годишно.
„Сè на сè, постигнатиот договор е пакет со кој можеме да бидеме многу задоволни во Австрија“, рече Курц по неколкудневните тешки преговори во Брисел.
Лидерите на ЕУ-27 постигнаа договор рано утрово, по неколкудневните маратонски преговори, за повеќегодишен заеднички буџет и фонд за закрепнување.
Вкупниот износ на пакетот за опоравување е 1,824 милијарди евра, од кои 1,074 милијарди се во рамките на заедничкиот буџет за периодот од 2021 до 2027 година.
Фондот за опоравување на ЕУ изнесува 750 милијарди евра и се состои од 390 милијарди грантови и 360 милијарди заеми.
Овој фонд ќе биде финансиран со заедничко задолжување на ЕУ на светските пазари на капитал, а крајниот рок за отплата на заемот е крајот на 2058 година.