Австрискиот канцелар Себастијан Курц ги предупреди граѓаните на драматичната состојба во врска со епидемиолошката состојба и проценува дека земјата наскоро ќе се соочи со 1.000 новоинфицирани лица на ден.
– Она со што се соочуваме е почетокот на вториот бран. Бројот на новоинфицирани расте од ден на ден – посочи тој во писмената изјава за агенцијата АПА.
Тој им порача на населението да се придржува до сите мерки.
– Пред две недели, имавме околу 350 новозаразени на ден, а вчера дури и повеќе од 850. Особено драматичен е развојот во Виена, каде што имаме околу 50 проценти од сите нови пациенти во Австрија. Наскоро ќе ја надминеме бројката од 1.000 новоинфицирани лица на ден – нагласи тој.
Курц побара од граѓаните да ги намалат социјалните контакти, да носат маски и да ја држат дистанцата на сите места.
И покрај влошувањето на епидемиолошката состојба, канцеларот останува на својата изјава од крајот на август дека „на крајот од тунелот се гледа светло“ и дека следното лето повторно ќе биде нормално.
– Сепак, есента и зимата ќе бидат тешки за сите нас. Затоа сега сите мора да ги надминеме следните месеци заедно со истата дисциплина како во минатото – рече Курц.