Претставникот на Европската унија за дијалог меѓу Косово и Србија, Мирослав Лајчак, повторно е во Приштина, а подоцна денеска ќе го посети и Белград.
Тој со највисоките претставници ќе разговара за француско-германскиот предлог за нормализација на односите меѓу Србија и Косово.
Косовскиот премиер Албин Курти пред средбата со Лајчак разговараше со амбасадорите на Квинтата.
Во интервју за новинската агенција АП, Курти ѝ порача на меѓународната заедница да не врши притисок врз Косово да формира заедница од српски општини и дека фокусот треба да биде ставен на „демократизацијата на Србија и отстранувањето на српските хегемонистички идеи“.
Претседателката на Владата на Србија, Ана Брнабиќ, доаѓањето на специјалниот пратеник на Европската унија, Мирослав Лајчак, во Приштина и во Белград го оцени како облик на притисок за спроведување на француско-германскиот предлог и формирање заедница на српски општини во Косово.
„Дипломатските активности се забрзуваат“, рече Брнабиќ.