На прес-конференција по завршувањето на денешниот состанок, на кој ЕЦБ ги задржа каматните стапки непроменети, претседателката на централната банка Кристин Лагард изјави дека економијата на еврозоната е отпорна и во „добра состојба“ и се очекува да продолжи да расте, предводена од секторот на услуги.
Таа, исто така, истакна дека тензиите во глобалната трговија веројатно ќе имаат негативно влијание врз растот во еврозоната оваа и следната година, при што Лагард ја повика Европската Унија да ја зајакне еврозоната и нејзината економија „во сегашниот геополитички контекст“.
„Растот останува отпорен, со посилна потрошувачка и инвестиции, и е доминиран од услугите, додека индустријата и градежништвото остануваат непроменети. Домашната побарувачка веројатно ќе биде главниот двигател на растот во наредните години“, рече шефицата на ЕЦБ, додавајќи дека владините трошоци за одбрана треба да ги поддржат инвестициите.
Во врска со инфлацијата, Лагард рече дека индикаторите за инфлација „малку се промениле“ во последните месеци и останале во согласност со целта на ЕЦБ од 2%. Инфлацијата треба да се намали на краток рок поради падот на цените на енергијата, паѓајќи под целта. Сепак, се очекува да се врати на целното ниво во 2028 година, „спроти силното зголемување на инфлацијата во енергетските сектори“, делумно поради стапувањето во сила на системот за тргување со емисии на ЕУ.
Зборувајќи по денешниот состанок на ЕЦБ, Лагард истакна „посилни од очекуваните инвестиции“, во голема мера поттикнати од инвестициите во вештачка интелигенција, вклучувајќи ги трошоците за компјутерски капацитет, телекомуникации и нематеријални средства. Таа рече дека и големите компании и малите и средните фирми ги зголемиле инвестициите.
Лагард, исто така, рече дека „извозот изненадувачки скокнаl“, иако ЕЦБ очекува трговијата да стане „кочница за економскиот раст“ со стапувањето на сила на повисоките тарифи.
Таа истакна дека централната банка ќе продолжи да проценува дали неодамнешните подобрувања одразуваат трајна промена во динамиката на раст или претставуваат само привремен поттик.