На патот Кантавир кај Суботица вчера беше пронајдена мала лавица. Случаен минувач ја забележал, го запрел неговиот автомобил и ја извлекол од патот, а потоа повикал полиција. Младенчето моментално е во засолништето на зоолошката градина Палиќ.
Андријана Тот од Зоолошката градина Палиќ за ТВ Нова изјави дека малата лавица е во лоша состојба, пренесува Н1.
„За жал, имала несоодветна исхрана, месото не го препознава како храна, моравме насила да и даваме месо, ѝ го турнавме месото во уста за да го препознае како храна“, објасни таа.
Според проценката на ветеринарот, младенчето најверојатно не примило друга храна освен кравјо млеко, кое, како што нагласи Тот, е несоодветно за хранење на диви мачки.
Како што додала, лавицата има атрофирани мускули на задните екстремитети, што веројатно е резултат на нејзиното престојување во помал простор, каде што не можела адекватно да се движи.
„Беше зафатена со надворешни и внатрешни паразити, внесени од муви“, истакна Тот и нагласи дека лавицата имала многу пониска телесна температура од вообичаената за дивите мачки, поради што морале да воведат греалки.
На прашањето колку години има лавицата, Тот рече дека веројатно е околу четири или пет месеци, но дека е тешко да се процени бидејќи мускулатурата на младенчето не била доволно развиена.
Малата лавица има и воспаление на дигестивниот и уринарниот тракт, а прима инфузија и одредена терапија.
„Не можеме веднаш да ги добиеме сите информации, мора да помине време да видиме како ќе оди закрепнувањето, најголемиот проблем е инфекцијата со внатрешни паразити кои можат да го нападнат мозокот и другите органи. Анализата на крвта и биохемијата го покажаа воспалението, па сега работиме на лекување на тие проблеми“, објасни Тот.
Таа рече дека ветеринарите се оптимисти, но дека тоа не значи дека лавицата сигурно ќе се опорави.
Лавица веројатно од црниот пазар
Тот рече и дека Зоолошката градина нема информации од каде дошла лавицата и дека со тоа се занимаваат надлежните органи, но се претпоставува дека животното дошло од црниот пазар.
„Во Србија чувањето диви и егзотични животни е забрането со закон, а нивното несоодветно чување и напуштање се смета за злоупотреба и е исто така кривично дело“, предупреди Тот.
Таа нагласи дека физичкото лице не може соодветно да се грижи за дивите животни, ниту може да обезбеди безбедносни мерки кои не би ги загрозиле другите граѓани.
„Исхраната е многу важна. Животното мора да покаже природно однесување, во мал кафез не можете да му дозволите да се движи адекватно“, објасни таа.
Таа рече дека лавовите и тигрите не претставуваат статусен симбол или престиж и дека црниот пазар ја загрозува нивната популација на планетата.
Во 2023 година, во дивината живееле 24.000 лавови.
„Пред неколку години ги имаше само 20.000. Со нелегалната трговија повторно ја намалуваме таа бројка во природата, а голем проблем е уништувањето на нивните природни живеалишта“, рече таа.
Тот објасни и дека просторот во зоолошката е за ограничен број животни и дека прашање е дали ќе остане во Палиќ или ќе биде сместена во друга зоолошка градина или резерват.