Рускиот министер за надворешни работи Сергеј Лавров и српскиот вицепремиер Александар Вулин ја потврдија посветеноста на Москва и Белград за развој на односите и покрај притисокот од Западот, пренесува ТАСС.
Ова се наведува во пораката на руското Министерство за надворешни работи по средбата на маргините на меѓународната конференција за евроазиска безбедност во Минск.
„Страните ја потврдија својата посветеност, и покрај надворешниот притисок, за сеопфатен развој на билатералните односи на различни полиња“, соопшти дипломатскиот оддел.
Исто така, за време на размената на мислења за ситуацијата на Балканот, посебно внимание беше посветено на ситуацијата на Косово во „светлина на тековната антисрпска репресија од страна на властите во Приштина“.
„Во решението на косовското прашање беше нагласена потребата од почитување на резолуцијата 1244 на Советот за безбедност на ОН како неприкосновен услов за изнаоѓање праведно решение на косовската криза, одржување на мирот и стабилноста во балканскиот регион. Беа допрени и други актуелни аспекти на меѓународната политика“, соопшти руското Министерство за надворешни работи.
Вулин претходно им се обрати на учесниците на конференцијата, пренесува белоруската агенција Белта, кога рече дека најголемиот проблем денес не е климата или економијата, туку недостатокот на меѓународно право.
„Сега нашиот проблем е апсолутниот недостаток на меѓународно право. Нема меѓународно право“, нагласи вицепремиерот на Србија.
Вулин и Лавров се согласија дека разговорот меѓу претседателите на Србија и Русија, Александар Вучиќ и Владимир Путин е значаен за односите меѓу двете земји.