Рускиот министер за надворешни работи Сергеј Лавров денес изјави дека францускиот претседател Емануел Макрон и германскиот канцелар Фридрих Мерц „конечно го изгубија разумот“ и се обидуваат да се вратат во времето кога нивните земји сакаа да ја освојат цела Европа.
Тој привлече внимание на неодамнешната заедничка статија на Макрон и Мерц, во која тие ја нарекуваат Русија „главна закана“ и посочуваат на потребата Европа да се „вооружи“.
„Мислам дека само овие цитати се доволни за човек кој има малку разбирање за тоа што се случува во Европа и ги следи настаните да разбере дека овие личности целосно го изгубиле разумот и отворено се обидуваат да се вратат во времето кога Франција и Германија сакаа да ја освојат Европа, пред сè Руската империја и Советскиот Сојуз“, рече Лавров на прес-конференција по средбата со киргистанскиот претседател Садир Џапаров и министерот за надворешни работи Женбек Кулубаев, пренесува „Руска газета“.
Лавров нагласи дека Русија ќе продолжи да брани праведно решение за украинската криза.
Западот никогаш нема да може да ѝ нанесе стратешки пораз на Русија
Западот никогаш не успеал и никогаш нема да успее да ѝ нанесе стратешки пораз на Русија, смета рускиот министер за надворешни работи .
„Сведоци сме на невидена конфронтација меѓу нашата земја и колективниот Запад, кој повторно одлучи да војува против нас и да ѝ нанесе стратешки пораз на Русија, во суштина користејќи го нацистичкиот режим во Киев како ударна тупаница. Западот никогаш не успеал во ова, а нема да успее ниту овој пат“, рече рускиот министер, пренесува „Известија“.
Тој ја нагласи посебната важност на блиските врски со Киргистан во сите области.
Шефот на руската дипломатија истакна дека „и покрај санкциите и нелегитимниот притисок“ има зголемување на меѓусебната трговија меѓу Русија и Киргистан, и дека соработката во хуманитарните, образовните и другите сфери се шири, вклучително и на меѓународните платформи.